දිස්ත්‍රික්කයේ සේවා අංශයේ හොදම ව්‍යවසායිකාව ලෙස සුරියවැව නැණසල ක්‍රියාකාරිණී දිපිකා ප්‍රියදර්ශනී මහත්මිය තොරාගත් බව හම්බන්තොට වාණිජ හා කර්මාන්ත මණ්ඩලය ප්‍රකාශ කරයි. ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය ලබා දුන් මගපෙන්වීම තමන්ට මැවැනි සම්මානයක් ලබා ගැනීමට දායකවු බව සුරියවැව නැණසල ක්‍රියාකාරිණිය පැවසුවාය.

දිස්ත්‍රික්කයක හොදම ව්‍යාපාරයක් ලෙස නැණසල මධ්‍යස්ථානයක් තෝරාගත් ප්‍රථම අවස්ථාව මෙයයි.

ග්‍රාමීය ප්‍රජාව වෙත තොරතුරු තාක්ෂණ ප්‍රතිලාභයන් ලබාදීම සදහා ජනාධිපති මහින්ද රාජපක්ෂ මැතිතුමාගේ සංකල්පයක් අනුව බිහිවුණු නැණසල මධ්‍යස්ථාන ඉන් ඔබ්බට ගොස් ජනතා අපේක්ෂා ඉටු කරන සේවා ස්ථාන බවට පරිවර්ථනය වීම සුවිශේෂී සිද්ධියක් බව ICTA ආයතනයේ ප්‍රධාන මෙහෙයුම් නිලධාරී රෙෂාන් දේවපුර මහතා පෙන්වා දෙයි. නැණසල ලාභ ලබන ග්‍රාමීය ව්‍යාපාරයක් බවට පත්කිරීමට ඇති හැකියාව එමගින් සනාථ කර ඇතැයි ඔහු අවධාරණය කළේය.

රුහුණු විශ්ව විද්‍යාලයේ නියෝජ්‍ය උප කුලපති ගාමිණී සේනානායක හම්බන්තොට  හැටන් නැෂනල් බැංකු කළමනාකරු බී.එස්.කේ. ජයතිලක යන මහත්වරුන් අතින් දීපිකා ප්‍රියදර්ශනී මහත්මිය එම සම්මානය ලබා ගත් අයුරු ජායාරූපයේ දැක්වේ.

නිර්මාණශීලි ලෙස රාජ්‍ය අංශයේ තොරතුරු තාක්ෂණ ව්‍යාපෘති ඉදිරිපත් කිරීම වෙනුවෙන් ඉන්ෆොටෙල් 2010 විශිෂ්ටතා සම්මානය ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනයට (ICTA) හිමි වී ඇත.

පසුගියදා කොළඹ දී පැවැත්වුණු එම ප්‍රදර්ශනයේ දී රාජ්‍ය අංශයේ තොරතුරු තාක්ෂණ ව්‍යාපෘති තුනක් ආකර්ශනීය ලෙස හා නිර්මාණශීලි ලෙස මහජනයා වෙත ඉදිරිපත් කිරීම වෙනුවෙන් ICTA ආයතනයට එම සම්මානය හිමි විය.

ශ්‍රී ලංකාවේ පැවැත්වෙන දැවැන්ත ම තොරතුරු සහ සන්නිවේදන තාක්‍ෂණ ප්‍රදර්ශනය වන ‘ඉන්ෆොටෙල් 2010’ මෙ වර ද කොළඹ බණ්ඩාරනායක අනුස්මරණ සම්මන්ත්‍රණ ශාලාවේ දී ඔක්තෝම්බර් 01දා සිට 04 දා දක්වා පැවැත්වුණු අතර, එහි තේමාව වූයේ ‘දියුණුවට තොරතුරු තාක්‍ෂණය’ යන්න ය.

විශේෂයෙන් ඉන්ෆොටෙල් ප්‍රදර්ශනය නැරැඹීම සදහා ඔක්‍තෝම්බර් 01 දා සිට 04 දා තෙක් කොළඹ සිරිමාවෝ බණ්ඩාරනායක ජාත්‍යන්තර ප්‍රදර්ශන ශාලාවට පැමිණි මහජනතාවට ක්‍ෂණිකව ඔවුන්ගේ උප්පැන්න සහ විවාහ සහතිකවල පිටපත් තොරතුරු තා‍‍‍‍‍‍‍ක්ෂණය ආධාරයෙන් නිකුත් කිරීමට ද ICTA ප්‍රදර්ශන කුටියේ දී පහසුකම් සපයා තිබීම ද එම සම්මානය පිරිනැමීමේ දී සැලකිල්ලට ගත් බව ඉන්ෆොටෙල් සංවිධායකයෝ පවසති.

කොළඹ දිසාපතිතුමාගේ අධීක්ෂණය යටතේ ඉතා කෙටි කාලයක දී උප්පැන්න සහතික පිටපත් දහසකට ආසන්න ගණනක් නිකුත් කිරීමට එහි දී හැකි විය.

ඊට අමතරව පාසල් සිසු සිසුවියන් හය දහසකට ව්‍යාපාර ක්‍රියාවලි බාහිරකරණ (BPO) ක්‍ෂේත්‍රයේ රැකියා පිළිබද වෘත්තීය මාර්ගෝපදේශන වැඩමුළුවක් පවත්වමින් ICTA ආයතනය මෙ වර ජාතික සමුළුවට අර්ථවත් වටිනාකමක් ද ලබා දුන් බව ද ඉන්ෆොටෙල් සංවිධායක කමිටුවේ සභාපති ඒ. ජයසීලන් මහතා සඳහන් කළේ ය.

ඉන්ෆොටෙල් ප්‍රදර්ශනය අර්ථාන්විත ලෙස අලංකාර කිරීමට දායක වීම නිමිති කර ගනිමින් පසුගිය 2008 වසරේ දී පැවැති ප්‍රදර්ශනයේ දී ද විශේෂ සම්මානයක් ICTA ආයතනයට හිමි විය.

මහජන දුක්ගැනවිලි සඳහා විසඳුම් ලබා දිය හැකි රාජ්‍ය ආයතනයක් තොරතුරු තාක්‍ෂණයේ ආධාරයෙන් ලඟදීම පිහිටුවේ. මේ සඳහා පුළුල් ලෙස කරුණු අධ්‍යයනය කර ඇතැයි ජනාධිපති ලේකම් ලලිත් වීරතුංග මහතා පවසයි.

1919 – රාජ්‍ය තොරතුරු කේන්ද්‍රයට සමගාමීව මෙම මහජන දුක්ගැනවිලි කළමනාකරණ වැඩපිළිවෙල ක්‍රියාවට නැංවේ. එම ආයතනය ඝෘජුවම ජනාධිපතිතුමාගේ අධීක්‍ෂණය යටතේ පවත්වා ගෙන යන අතර එහි සියලුම කටයුතු සඳහා තොරතුරු තාක්‍ෂණය භාවිතා කිරීමට නියමිත බව ලලිත් වීරතුංග මහතා අවධාරණය කරයි.

‘ඉ- ප්‍රාදේශීය ලේකම් කාර්යාල ‘ව්‍යාපෘතිය කොළඹ ප්‍රා දේශීය ලේකම් කාර්යාලයේදී ආරම්භ කරමින් මෙම අදහස් ප්‍රකාශ කල පනාධිපති ලේකම්තුමා ජනතාවට යහපත් රාජ්‍ය සේවයක් ලබාදීම සෑම රාජ්‍ය නිළධාරියෙකුගේම වගකීමක් බව අවධාරණය කලේය.

පරිගණකයට බොහෝ දෑ කලහැකි වුවත් එහෙත් ඊට ජනතාවගේ සිත් දිනාගත නොහැකි බවත් එය කල හැකි වන්නේ රාජ්‍ය නිළධාරියාට බවද වීරතුංග මහතා පවසයි. ජනතා හදවතේ රිද්මය මනාව හඳුනා ගත් රාජ්‍ය නායකයෙකු වන ජනාධිපති මහින්ද රාජපක්‍ෂ මැතිතුමාගේ අපේක්‍ෂාව වන්නේ නෙතේ කඳුළු පුරවාගෙන රාජ්‍ය ආයතනයකට පැමිණෙන ජනතාවගේ මුවගට සිනහවක් කැන්දවීම බවද ලලිත් වීරතුංග මැතිතුමා කීය. එය කල හැකි වන්නේ රාජ්‍ය නිළධාරියාට බවත් ඊට සුදුසු පසුබිම දැන් සකස් වෙමින් පවතින බවද කීය.

රටේ ජනතාව ඔවුන්ගේ ප්‍රශ්න ගැටළු ඝෘජුවම ජනාධිපතිවරයා වෙත යොමු කිරීමට පෙළඹී සිටින්නේ තම ඡන්දයෙන් තේරීපත් වු පුද්ගලයා ජනාධිපතිවරයා ලෙස ඔවුන් කල්පනා කරන නිසා බවත් එය විධායක ජනාධිපති ධූරය තුල පවතින යහපත් ලක්‍ෂණයක් බව තමා විශ්වාස කරන බවත් වීරතුංග මහතා මෙහිදී කීය.

රාජ්‍ය ආයතන පිළිබදව මහජනතාව තුල ප්‍රිය ජනක ආකල්ප ඇති කරවීමට මෙවැනි ව්‍යාපෘති ඉවහල් වන බවත් මෙම ‘ඉ-ප්‍රාදේශීය ලේකම් ව්‍යාපෘතිය’  ඉදිරියේදී ශ්‍රි ලංකාවේම ක්‍රියාත්මක කිරීමට කටයුතු කරන බවත් රාජ්‍ය පරිපාලන හා ස්වදේශ කටයුතු ඇමැති ඩබ්ලිව්. ඩී. ජේ. සෙනෙවිරත්න මහතා මෙහිදී  කීය.

රාජ්‍ය සේවය කාර්යක්‍ෂම කිරීමට මෙය ඉවහල් වනු ඇතැයිද රාජ්‍ය සේවයට නවමු අත්දැකීමක් වන තොරතුරු හා සන්නිවේදන තාක්‍ෂණය පිළිබඳ අනියත බියක් ඇතිකර ගත යුතු නැතැයිද කොළඹ දිස්ත්‍රික් පාර්ලිමේන්තු මන්ත්‍රී තිලංග සුමතිපාල මහතා මෙහිදී කීය.

යුද්ධය නිමා වීමෙන් පසු සංවර්ධනයේ ප්‍රතිලාභ දෙස නෙත් අයාගෙන සිටින ජනතාවගේ අපේක්‍ෂාවන් යතාර්තයක් කිරීමේ වගකීම රාජ්‍ය නිලධාරීන් වෙත පැවරී තිබෙන බවද තිලංග සුමතිපාල මහතා කීය.

ජනාධිපති මහින්ද රාජපක්‍ෂ මැතිතුමාගේ සංකල්පයක් වන ‘ඉ-ශ්‍රී ලංකා’ වැඩසටහන මෙවැනි ව්‍යාපෘති ඔස්සේ තව දුරටත් අරුත් ගැන්වෙන බවද රාජ්‍ය සේවයේ නව සංධිස්ථානයක් වශයෙන් මෙය හැඳින්විය හැකි බවද ශ්‍රී ලංකා තොරතුරු හා සන්නිවේදන තාක්‍ෂණ නියෝජිතායතනයේ (ICTA) ප්‍රධාන මෙහෙයුම් නිලධාරී රෙෂාන් දේවපුර මහතා මෙහිදී කීය.

‘ඉන්ෆොටෙල් 2010′ තොරතුරු සහ සන්නිවේදන තාක්ෂණ ප්‍රදර්ශනයේ ජාතික හවුල්කරු වශයෙන් ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය (ICTA) මෙ වර ද කටයුතු කරනු ඇත.

මෙය වාර්ෂිකව මෙරට පැවැත්වෙන දැවැන්තම තොරතුරු සහ සන්නිවේදන තාක්ෂණ ප්‍රදර්ශනය වේ.

තොරතුරු හා සන්නිවේදන තාක්ෂණයේ ප්‍රතිලාභ ජනතාවට ලැබී තිබෙන ආකාරය දැක්වෙන විශේෂ අංග රැසකින් සමන්විත ප්‍රදර්ශන කුටියක් මෙ වරත් ප්‍රදර්ශනය සදහා එක්කර තිබෙන බව ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනයේ (ICTA) ප්‍රධාන මෙහෙයුම් නිලධාරී රෙෂාන් දේවපුර මහතා සදහන් කරයි.

විශේෂයෙන් රාජ්‍ය අංශයෙන් මහජනතාවට සැපැයෙන සේවාවන් තොරතුරු තාක්ෂණයෙන් සවිබල ගැන් වී ඇති ආකාරය මෙහි දී මහජනතාවට දැක බලා ගත හැකි ය.

ඒ අනුව සිය උප්පැන්න සහතික පිටපතක් ක්ෂණයකින් ICTA ප්‍රදර්ශන කුටියේ දී ලබා ගැනීමට කොළඹ දිසාලේකම්වරයාගේ සහාය ඇතිව මෙහි දී පහසුකම් සලසා ඇත.

‘දියුණුවට තොරතුරු තාක්ෂණය’ මෙ වර ප්‍රදර්ශනයේ තේමාව වේ.
එම ප්‍රදර්ශනය ඔක්තෝබර් 01දා සිට 04දා දක්වා කොළඹ බණ්ඩාරනායක අනුස්මරණ සම්මන්ත්‍රණ ශාලාවේ දී පැවැත්වේ.

වෙබ් අඩවි නිර්මාණය කිරීම සහ පවත්වා ගෙන යෑම පිළිබදව රාජ්‍ය නිලධාරීනට පුහූණුවක් ලබා දීමට ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනයේ (ICTA) අවධානය යොමු වී තිබේ.

රාජ්‍ය ආයතනයන්ට වෙබ් අඩවි නිර්මාණය කර දීම සදහා නියෝජිතායතනය ක්‍රියාත්මක කර තිබෙන ව්‍යාපෘතිය මේ අනුව තව දුරටත් විධිමත් සහ ඵලදායී කිරීමට හැකි වෙතැයි නියෝජිතායතනය පවසයි.

එක් රාජ්‍ය ආයතනයකින් නිලධාරීන් දෙදෙනකුට එම පුහුණුව ලබා දීමට අපේක්ෂා කෙරේ.

රාජ්‍ය අංශය ප්‍රතිනිර්මාණය කිරීමේ වැඩසටහන යටතේ මෙය ක්‍රියාත්මක වන අතර රාජ්‍ය ආයතන සදහා වෙබ් අඩවි තුන්සියයකට ආසන්න ගණනක් මේ වන විට නිර්මාණය කර අවසන් බව ද නියෝජිතායතනය වැඩි දුරටත් සදහන් කරයි.
 

ශ්‍රී ලංකාවේ සුළු හා මධ්‍ය පරිමාණ තොරතුරු තාක්ෂණ ව්‍යාපාර නගා සිටුවීමේ අරමූණින් ඔවුන් වෙත මුල්‍ය හා තාක්ෂණික ප්‍රදානයන් ලබා දීමේ ජාතික ව්‍යාපෘතියක් ආරම්භ කෙරේ.

ජනාධිපති ලේකම් කාර්යාලය යටතේ ක්‍රියාත්මක ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය (ICTA) විසින් මේ සදහා පියවර ගෙන තිබේ.

මෙ රට තොරතුරු හා සන්නිවේදන තාක්ෂණ ක්ෂේත්‍රයේ නිරත සුළු හා මධ්‍ය පරිමාණ කර්මාන්තකරුවන් සවිබල ගැන්වීමත් නව පිරිස් මීට ප්‍රවේශ කර ගැනීමත් එහි මුලික අරමුණක් වේ.

එම වැඩසටහන යටතේ මුල්‍ය සහ තාක්ෂණික පහසුකම් ලබා දෙන අතර, මෙරට තොරතුරු හා සන්නිවේදන තාක්ෂණ ක්ෂේත්‍රයේ ප්‍රමුඛ පෙළේ ආයතන කිහිපයක් ඊට සිය දායකත්වය ලබා දෙයි. මයික්‍රොසොෆ්ට් ශ්‍රී ලංකා සමාගම, ඉන්ටෙල් සමාගම, මොරටුව විශ්ව විද්‍යාලය හා කොළඹ විශ්ව විද්‍යාලය මේ අතර වේ.

තොරතුරු හා සන්නිවේදන තාක්ෂණ ක්ෂේත්‍රයේ යෙදී සිටින ආයතන 20ක් සදහා මෙසේ තාක්ෂණික හා මුල්‍ය පහසුකම් ලබා දෙන බව ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය(ICTA) සදහන් කරයි.

මේ පිළිබදව දැනුවත් කිරීමේ මාධ්‍ය හමුවක් නොබෝදා කොළඹ දී පැවැති අතර එහි දී අදහස් දැක්වු ශ්‍රී ලංකා තොරතුරු හා සන්නි‍වේදන තාක්ෂණ නියෝජිතායතනයේ (ICTA) නීති උපදේශක හා වැඩසටහන් අධ්‍යක්ෂ ජයන්ත ප්‍රනාන්දු මහතා කියා සිටියේ ‘මහින්ද චින්තන ඉදිරි දැක්ම’ ප්‍රතිපත්ති ප්‍රකාශයේ සදහන් පරිදි මෙම කලාපයේ දැනුමේ කේන්ද්‍රස්ථානය බවට ශ්‍රී ලංකාව පත් කිරීමේ අභිලාශයන් යථාර්ථයක් කර ගැනීම සදහා මෙවැනි ව්‍යාපෘතීන් රුකුලක් වන බව ය.

තොරතුරු තාක්ෂණ ව්‍යාපාරයේ නිරත සුළු හා මධ්‍ය පරිමාණ කර්මාන්ත කරුවන් නගා සිටුවීම වෙනුවෙන් තම නියෝජිතායතනයට දායක වීමට හැකි වීම ගැන සතුටු වන බව ද ඔහු පෙන්වා දුන්නේය.

www.icta.lk/icbp වෙබ් අඩවියට පිවිසීමෙන් මේ පිළිබද වැඩි විස්තර දැනගත හැකි වේ.
 

දුම්රිය ධාවන මෙහෙයුම් කටයුතු සදහා චන්ද්‍රිකා තාක්ෂණය යොදා ගැනීමට දුම්රිය දෙපාර්තමේන්තුව සැරැසෙයි.
 
ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය (ICTA) සහ ශ්‍රී ලංකා දුම්රිය දෙපාර්තමේන්තුව ඒකාබද්ධව එම ව්‍යාපෘතිය ක්‍රියාවට නැංවීමට සැලැසුම් කර ඇත.

මේ අනුව දුම්රිය ධාවන කටයුතු ඉතා ඉහළ මට්ටමකට ගෙන ඒමට හැකිවෙතැයි ද එමගින් දුම්රිය මගීන්ට වඩාත් කාර්යයක්ෂම දුම්රිය සේවාවක් ලබා දිය හැකි බව ද එම නියෝජිතායතනයේ ප්‍රධාන මෙහෙයුම් නිලධාරී රෙෂාන් දේවපුර මහතා සදහන් කරයි.

ප්‍රථමයෙන් නියමු ව්‍යාපෘතියක් ලෙස දුම්රිය 5ක එය ක්‍රියාත්මක වන අතර, සති තුනක පමණ කෙටි කාලයකින් අනතුරුව දුම්රිය 80ක් දක්වා ව්‍යාප්ත කිරීමට නියමිත ය.

එම නව ක්‍රමවේදයත් සමඟ දැනට බහුල වශයෙන් සිදුවෙන දුම්රිය ප්‍රමාදයන් අවම මට්ටමකට ගෙන ඒමට හැකි වන බව ද රෙෂාන් දේවපුර මහතා පවසයි.

දුම්රිය පාලක මැදිරිය සහ ධාවනය වන දුම්රියක් අතර දැනට තොරතුරු හුවමාරු කර ගනු ලබන්නේ ඉතා අවම තාක්ෂණික ක්‍රමවේදයන් ඔස්සේ වන අතර දුම්රියක ධාවන ගමන් මාර්ගය අනු රූ ලෙස සටහන් කර ගැනීම ඊට එක් උදාහරණයකි.

මෙසේ චන්ද්‍රිකා තාක්ෂණය යොදා ගැනීමත් සමගම දුම්රිය ධාවනය වන ආකාරය දුම්රිය පාලක මැදිරියට පරිගණක තිරයක් ඔස්සේ සජීවීව ම දැක ගැනීමට හැකිවන අතර පාලක මැදිරිය සහ දුම්රියක් අතර තොරතුරු හුවමාරු කර ගැනීම ද ඒ ආකාරයෙන් ම සිදු කර ගත හැකි වීම විශේෂත්වයකි. දුම්රිය හදිසි ආපදාවකට ලක් වුවහොත් එම මොහොතේදී ම සංඥාවක් මගින් පාලක මැදිරිය දැනුවත් කිරීම ද නව ක්‍රමවේදය මගින් සිදු කෙරේ.

දුම්රිය ධාවනය වෙමින් සිටින ප්‍රදේශය පසු කරමින් සිටින දුම්රිය ස්ථානය මෙන් ම දුම්රිය ස්ථානයට දුම්රිය ළඟාවන නිශ්චිත ම වේලාව දුම්රිය මගීන්ට එම නව ක්‍රම වේදය ඔස්සේ දැනගත හැකි වේ.

දුම්රිය එන්ජිමේ සවි කරන ලද විශේෂ තාක්ෂණික උපකරණයක් මගින් දුම්රිය පාලක මැදිරිය සමඟ සබදතා ගොඩනගා ගනිමින් එම නව ක්‍රමවේදය ක්‍රියාත්මක වේ.
 

ජනතාව අපේක්ෂා කරන අන්දමේ රාජ්‍ය සේවාවක් සැපැයිය හැක්කේ තොරතුරු හා සන්නිවේදන තාක්ෂණය උපයෝගි කර ගෙන පමණක් බව ජනාධිපති ලේකම් ලලිත් වීරතුංග මහතා අවධාරණය කරයි.

රාජ්‍ය සේවය ජනතාවට තව දුරටත් සමීප කරවීම ජනපතිවරයාගේ එකම අරමුණ බව පෙන්වා දෙන ලලිත් වීරතුංග මහතා ඒ කාර්යයයේ දී තොරතුරු හා සන්නිවේදන තාක්ෂණය මෙවලමක් ලෙස යොදා ගත හැකි බව ද පැවැසීය.

ඒ මහතා මේ බව ප්‍රකාශ කළේ “ඉ- රාජ්‍ය ප්‍රතිපත්තිය” පිළිබද අමාත්‍යාංශ ලේකම්වරුන් දැනුවත් කිරීම සදහා පසුගියදා කොළඹ දී පැවති වැඩමුළුවක් අමතමිනි.

ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය (ICTA) විසින් එම වැඩමුළුව සංවිධානය කරනු ලැබ තිබිණි.
රජය ප්‍රථම වරට රාජ්‍ය අංශය සදහා ඉ-රාජ්‍ය ප්‍රතිපත්තියක් හදුන්වා දීමෙන් බලාපොරොත්තු වන්නේ රාජ්‍ය අංශයේ කටයුතු විධිමත්ව ප්‍රතිසංවිධානය කිරීම සදහා තොරතුරු තාක්ෂණය භාවිත කිරීම බව ද ඒ මහතා පෙන්වා දුන්නේ ය.

ක්‍රමවත්ව රාජ්‍ය ආයතන තුළ තොරතුරු තාක්ෂණය ප්‍රායෝගිකව භාවිත කිරීමට එම ප්‍රතිපත්තිය මගින් ඉඩ සලසා දී ඇති අතර, ඒ සදහා සරල උදාහරණයක් ලෙස රාජ්‍ය ආයතන සතු අන්තර්ජාල වෙබ් අඩවි යාවත්කාලීන කර විධිමත්ව පවත්වාගෙන යෑම තුළින් මහජනයා සමග යහපත් අන්තර් සබදතාවක් ගොඩනගා ගැනීමට ඇති හැකියාවක් ඇතැයි ද ඒ මහතා පෙන්වා දුන්නේ ය. එබැවින් සෑම රාජ්‍ය ආයතනයක් ම මාසයක් ඇතුළත සිය වෙබ් අඩවි යාවත්කාලීන කොට සක්‍රීය කිරීමට පියවර ගත යුතු යැයි ද පැවැසී ය.

මෙ රට රාජ්‍ය අංශය ජනතාවාදී ලෙස සකස් කිරීමට ඇති එකම උපාංගය තොරතුරු තාක්ෂණය බව පැවැසු ලලිත් වීරතුංග මහතා සෑම රාජ්‍ය ආයතනයක් ම අර්ථවත් ලෙස තොරතුරු තාක්ෂණය භාවිත කිරීම අත්‍යවශ්‍ය බව ද පෙන්වා දුන්නේ ය.

එම වැඩමුළුව සදහා අමාත්‍යාංශ ලේකම්වරු විශාල පිරිසක් සහභාගි වුහ. නීතිපති මොහාන් පීරිස් මහතා තොරතුරු තාක්ෂණයට අදාළ නීති රීති පිළිබදව එහි දී විශ්ලේෂණාත්මක දේශනයක් පැවැත්වූ අතර, අධිකරණ අමාත්‍යාංශයේ ලේකම් සුහද ගම්ලත් මහතා ද මෙරට පරිගණක නීතිය පිළිබද විශේෂ දේශනයක් පැවැත්වී ය.

ඉ- රාජ්‍ය ප්‍රතිපත්තිය www.icta.lk වෙබ් අඩවියෙන් බාගත කර ගත හැකි ය.